Eigðu skilvirk samskipti

Skilvirk samskipti við gesti geta breytt góðri dvöl í frábæra dvöl. Notaðu skilaboðakerfi Airbnb til að deila mikilvægum upplýsingum og áminningum, svara spurningum tímanlega og bjóða gesti velkomna.

Hvernig þú veitir upplýsingar leggur grunninn að upplifun gesta af dvölinni. Leggðu þig fram um að:

• Vera til taks. Kveiktu á tilkynningum til að taka á móti og bregðast tímanlega við skilaboðum gesta. Annette, gestgjafi í San Francisco segir að hún hvetji gesti til að „hafa samband þegar í stað til að við getum leyst úr málunum,“ jafnvel þótt um eitthvað minniháttar sé að ræða.

• Sýna gagnsæi. Greindu skýrt frá því sem gestir ættu að gera ráð fyrir. „Það sem þú segir gestum þínum að verði í boði þegar þeir koma á staðinn, verður að standast,“ segir Daniel, gestgjafi í San Francisco.

• Sýna hlýju í samskiptum. Spurðu gesti hvernig þú getur orðið þeim að liði til að viðkomandi líði sem best. „Við sem gestgjafar getum ekki séð allt fyrir,“ segir Sadie, ofurgestgjafi í Santa Fe í Nýju-Mexíkó.

• Sýna umhyggjusemi. Hvernig þú bregst við vandamáli getur skipt sköpum. „Þú getur breytt erfiðum aðstæðum í bókun síðar meir, ef þú berð þig rétt að með því að sýna samkennd og skjót viðbrögð,“ segir Felicity, meðlimur í ráðgjafaráði gestgjafa og ofurgestgjafi í Nýja-Suður Wales í Ástralíu.

Sjáðu fyrir hvað gestir þurfa að vita til að bjóða snurðulausa upplifun og minnka þörf á spurningum. Lykilstundirnar þegar kemur að skipulagningu ferðar eru meðal annars:

• Bókunarfyrirspurn eða -beiðni. Þú hefur sólarhring til að svara þegar gestir hafa samband en það er best að svara sem fyrst. Flestir gestgjafar svara innan klukkustundar. 

• Bókunarstaðfesting. Sendu gestum skilaboð til að þakka fyrir bókunina og láta vita að þú sért til taks til að svara öllum spurningum sem viðkomandi kunna að hafa.

• Koma. Minntu gesti á hvar þeir geti nálgast innritunarleiðbeiningar í appinu um einum til tveimur dögum fyrir komu og tilgreindu allar aukalegar upplýsingar um hvernig má komast inn í eignina.

• Meðan á dvöl stendur. Spurðu gesti stuttu eftir komu hvort þeir hafi allt sem þeir þarfnist til að dvölin sé sem best. Þú getur mælt með uppáhalds verslunum þínum á staðnum, veitingastöðum og dægrastyttingu.

• Brottför. Sendu skilaboð skömmu eftir útritun þar sem þú þakkar gestum fyrir og biður þá um að skrifa umsögn. Gefðu viðkomandi umsögn eins fljótt og unnt er.

Gott svarhlutfall er einn af nokkrum þáttum sem geta hjálpað skráningunni þinni að birtast ofar í leitarniðurstöðum gesta á Airbnb. 

Nýttu þessa eiginleika í skilaboðaflipanum til að sjá fyrir og svara algengum spurningum án tafar:

Hraðsvör 

• Búðu til sniðmát fyrir skilaboð til að deila upplýsingum með einföldum hætti, eins og hvar eigi að leggja í stæði eða hvort gestir geti skilið farangur sinn eftir fyrir innritun.

• Þú getur sérsniðið þessi sniðmát með flýtikóðum sem fylla sjálfkrafa út tilteknar upplýsingar um gesti, bókun og skráningu. 

• Þegar þú hefur sett upp hraðsvör notar eiginleiki í skilaboðaflipanum gervigreind til að greina spurningu gests og leggur sjálfkrafa til það svar sem á best við hverju sinni. 

Tímasett skilaboð 

• Útbúðu stöðluð skilaboð og tímasettu sendingu þeirra til gesta á lykilstundum eins og þeim sem koma fram hér að ofan. 

• Þú getur einnig notað flýtikóða til að sérsníða þessi skilaboð.

Upplýsingarnar í þessari grein gætu hafa breyst frá birtingu.