Umræða um mismunun í spjalli við gestgjafa á Airbnb

Við hjá Airbnb höldum reglulega fundi með gestgjöfum okkar til að eiga í mikilvægum samræðum um málefnin sem skipta þá mestu. Þessir fundir eiga ýmislegt sameiginlegt hvort sem við fjöllum um einkunnir fyrir staðsetningu eða umsagnir gestgjafa; umræðurnar eru heiðarlegar og hreinskilnar og þar er tekið á erfiðum málum.

Í október 2018 breytti Airbnb því hvernig notendamyndir gesta eru birtar til að ýta undir hlutlægari ákvarðanatöku hjá gestgjöfum. Notendamyndir gesta eru nú aðeins sýndar þegar bókun hefur verið staðfest.

Sumir gestgjafar lýstu áhyggjum af breytingunni og ítrekuðu mikilvægi þeirra upplýsinga sem fást um gesti. En margir aðrir, eins og Dennis, fögnuðu breytingunni og bentu á að myndir geta stuðlað að mismunun.

„Margir gestir hafa komið til mín og sagt: „Ástæðan fyrir því að ég valdi þig [sem gestgjafa] er sú að ég vissi að mér yrði ekki hafnað vegna þess hver ég er““, segir Dennis.

Laura Chambers, þáverandi framkvæmdastjóri Airbnb, minntist í lok spjallsins á að þótt umræður um mismunun séu flóknar og erfiðar þá séu þær einnig nauðsynlegar. Það er mörgum erfitt að tala um mismunun en við verðum að horfast í augun á henni, saman, áður en við getum barist gegn henni.

Við erum öll hlutdræg. En fyrirtæki eins og Airbnb geta komið í veg fyrir að fólk taki hlutdrægar ákvarðanir. Þess vegna skuldbundum við okkur árið 2016 til að meta hvernig notendamyndir birtast í bókunarferlinu. Nú eru notendamyndir gesta ekki sýndar gestgjöfum fyrr en bókun hefur verið staðfest, sem ýtir undir hlutlægari ákvarðanatöku hjá gestgjöfum.

Við komumst að þessari ákvörðun eftir fjölda samtala við gestgjafa og gesti. Þótt flestir gestir hafi myndir sögðust sumir gestir ekki vilja sýna mynd af sér við bókun. Við virðum einnig áhyggjur þeirra varðandi möguleikann á því að myndir verði misnotaðar á einhvern hátt sem brýtur í bága við reglur okkar gegn mismunun.

Gestgjafar hafa um leið sagt okkur að þeir kunni að meta notendamyndir af því að þær geta hjálpað gestgjöfum og gestum að kynnast áður en ferð hefst og til að þekkja gesti í sjón við innritun. Við höfum einnig tekið eftir því hvernig myndir geta gagnast til að auka traust og samfélagskennd.

Til að veita gestgjöfum eins og þér meiri stjórn í þessu ferli og til að mynda traust hjá gestum fyrir ferð getur þú:

• Gert kröfu um að gestir framvísi opinberum skilríkjum á Airbnb áður en þeir geta bókað eignina þína
• Sent gestum skilaboð til að spyrja um tilgang ferðar þeirra
• Skoðað umsagnir fyrri gesta til að vita hvað aðrir gestgjafar höfðu að segja um upplifun sína af gestum
• Gert kröfu um að gestir séu með notandamynd en myndin birtist þó ekki fyrr en bókun hefur verið samþykkt

Þessi skref geta gagnast gestgjöfum þótt áfram sé reynt að draga úr mismunun. Við tókum einnig saman upplýsingasafn sem útskýrir mismunandi hlutdrægni og staðalímyndir, áhrif þeirra á upplifun fólks á verkvangi Airbnb og hvernig vinna má bug á þeim.

En margt er enn ógert og við vitum að þetta er aðeins hluti af því starfi. Við munum áfram funda með gestgjöfum til að læra hvernig við getum unnið saman svo að fólk af ólíkum bakgrunni finni til öryggis, virðingar og hlýju.